एमपीएससी मंत्र : अभियांत्रिकी सेवां तांत्रिक अभिवृत्ती
पूर्व परीक्षेतील अभियांत्रिकी अभिवृत्ती अभ्यासक्रमामध्ये पाच उपघटक समाविष्ट करण्यात आले आहेत.
(संग्रहित छायाचित्र)
अभियांत्रिकी सेवा पूर्व परीक्षेच्या अभ्यासक्रमातील तांत्रिक अभिवृत्ती घटकासाठी एकूण १०० पकी ६० गुण आहेत. मागील लेखामध्ये या घटकावर विचारण्यात आलेल्या प्रश्नांचे विश्लेषण व प्रश्नांचा पॅटर्न यावर चर्चा करण्यात आली. या लेखामध्ये या घटकांच्या तयारीबाबत चर्चा करण्यात येत आहे.
पूर्व परीक्षेतील अभियांत्रिकी अभिवृत्ती अभ्यासक्रमामध्ये पाच उपघटक समाविष्ट करण्यात आले आहेत. उपयोजित यंत्रशास्त्र, अभियांत्रिकी यंत्रशास्त्र, स्थापत्य अभियांत्रिकी, यांत्रिकी अभियांत्रिकी व विद्युत अभियांत्रिकी. या घटकांची काठीण्य पातळी पदवी परीक्षेइतकी असल्याचे आयोगाने नमूद केलेले आहे. मात्र यातील बहुतांश घटक हे अभियांत्रिकी अभ्यासक्रमाच्या चार वर्षांपकी पहिल्या वर्षांच्या अभ्यासक्रमातील आहेत हे विश्लेषणावरून लक्षात येते. अभियांत्रिकी अभिवृत्तीमध्ये सद्धांतिक / पारंपरिक आणि उपयोजित गणिते अशा दोन प्रकारचे प्रश्न विचारण्यात आलेले आहेत. तयारी करताना अशा दोन्ही प्रकारच्या प्रश्नांसाठी करावी लागणार आहे. पण त्यातही कोणत्या घटकाच्या कोणत्या स्वरूपावर आयोगाने भर दिला आहे ते समजून घेणे आवश्यक आहे.
* अभियांत्रिकी अभिवृत्ती घटकामध्ये प्रश्नसंख्येच्या दृष्टीने सर्वाधिक महत्त्व उपयोजित यंत्रशास्त्र आणि अभियांत्रिकी यंत्रशास्त्र या दोन घटकांना दिलेले दिसते.
* यापकी उपयोजित यंत्रशास्त्र म्हणजे अभियांत्रिकी गणित (Engineering Mathematics) हा विषय आहे. यावर सर्वाधिक गणिते विचारलेली आहेत. या गणितांची काठीण्य पातळी ही पदवी स्तराची असल्याचे अभ्यासक्रमामध्ये नमूद असले तरी काही गणिते ही नक्कीच आव्हानात्मक आहेत. मात्र जवळपास १४ ते १५ इतकी प्रश्न संख्या आणि कोणतेही गणित सोडविण्यासाठी लागणारा वेळ पाहता या गणितांचा सराव हा तयारीचा महत्त्वाचा घटक असणे आवश्यक आहे. यातील किमान ८ ते १० प्रश्न बरोबर आल्यास कट ऑफच्या जवळ पोहोचणे सोपे होते. यासाठी अभियांत्रिकी क्षेत्रातील इतर स्पर्धा परीक्षांसाठीच्या गणितांचा सराव करणे खूप फायद्याचे ठरेल.
* अभियांत्रिकी यंत्रशास्त्राचे १४ पकी १० ते ११ प्रश्न मूलभूत सिद्धांत व त्यांचे उपयोजन विचारणारे म्हणजेच पारंपरिक आहेत. यासाठी अभियांत्रिकी पाठय़क्रमाचे मूलभूत संदर्भ साहित्य अभ्यासणे पुरेसे ठरेल. तर गणिते व समीकरणे सोडविण्याचा सराव बोनस गुण मिळवून देण्यासाठी उपयोगी ठरेल.
* अभियांत्रिकीच्या स्थापत्य, यांत्रिकी व विद्युत या शाखांसाठी प्रत्येकी १० प्रश्नांचे वेटेज आहे. मात्र तरीही प्रश्नांचे विश्लेषण केल्यास या घटकांच्या तयारीसाठी वेगवेगळी योजना आखणे आवश्यक आहे. उमेदवार ज्या शाखेचा अभियंता असेल त्या शाखेच्या अभ्यासक्रमाची उजळणी १० पकी किमान ८ गुण मिळवण्यासाठी पुरेशी ठरू शकते. मात्र बाकीच्या दोन शाखांच्या मूलभूत अभ्यासाशी पहिल्या वर्षीच्या परीक्षेनंतर फारसा संबंध राहिलेला नसतो त्यामुळे त्यांच्या तयारीसाठी जास्त मेहनत घेणे आवश्यक ठरते.
* उपयोजित यंत्रशास्त्रानंतर विद्युत अभियांत्रिकी घटकावर जास्त गणिते विचारलेली आहेत. या घटकावर सद्धांतिक व उपयोजित गणित या दोन्ही प्रकारच्या प्रश्नांची संख्या समसमान आहे. तुलनेने अभ्यासक्रमही सुटसुटीत असा आहे. त्यामुळे मूलभूत अभियांत्रिकीच्या तीन घटकांपकी विद्युत अभियांत्रिकीच्या तयारीस सर्वाधिक प्राधान्य देणे व्यवहार्य ठरते.
* स्थापत्य आणि यांत्रिकी अभियांत्रिकीवर सद्धांतिक / पारंपरिक प्रश्नांची संख्या जास्त आहे. अभियांत्रिकी यंत्रशास्त्रानंतर सर्वाधिक सद्धांतिक प्रश्न यांत्रिकी अभियांत्रिकीवर विचारलेले आहेत. त्यामुळे पारंपरिक अभ्यासक्रम कव्हर करताना अभियांत्रिकी यंत्रशास्त्र, यांत्रिकी अभियांत्रिकी, स्थापत्य अभियांत्रिकी अशा क्रमाने तयारी केल्यास फायदा होईल.
* सन २०१७ व २०१८ च्या प्रश्नपत्रिकांचे विश्लेषण केल्यास अभियांत्रिकी अभिवृत्तीच्या ६० प्रश्नांमध्ये बहुविधानी प्रश्नांची संख्या नगण्य होती. सन २०१७ मध्ये तीन बहुविधानी प्रश्न होते व ते पारंपरिक मुद्दय़ांवर आधारित होते. तर सन २०१८ मध्ये एकही बहुविधानी प्रश्न नव्हता. मात्र काही पारंपरिक मुद्दय़ांवरील प्रश्नांमध्ये गोंधळात टाकणारे पर्याय समाविष्ट होते. त्यामुळे सर्व उपघटकांच्या मूलभूत मुद्दय़ांचा अभ्यास पक्का करणे हे ६० पकी ३३ ते ३६ पारंपरिक प्रश्न सोडविण्यासाठी आवश्यक आहेच. शिवाय गणिते सोडविण्यासाठी केवळ सूत्रे पाठ असून भागणार नाही तर या पारंपरिक तयारीचे उपयोजन करणेही गरजेचे असते.
* एकूण १०० प्रश्न सोडविण्यासाठी ९० मिनिटांचा वेळ दिलेला आहे. यामध्ये एकूण किमान २४ ते २७ प्रश्न हे गणितांच्या स्वरूपात आहेत. गणिते सोडविण्यासाठी लागणारा वेळ पाहता परीक्षेच्या दरम्यान आधी पारंपरिक प्रश्न सोडवून मग शेवटची २५ मिनिटे गणितांसाठी राखून ठेवता यावीत अशा प्रकारे वेळेचे नियोजन आवश्यक आहे. नकारात्मक गुण पद्धतीचा विचार करता सर्व १०० प्रश्न सोडविणे व्यवहार्य नाही. त्यामुळे जास्तीत जास्त ९० प्रश्न सोडविण्याचे टाग्रेट असावे. यातील किमान ८० टक्के प्रश्न बरोबर आल्यास नकारात्मक गुण वजा होऊन ५४ गुण मिळू शकतात. या ९० प्रश्नांमध्ये १८ ते २० गणिते आत्मविश्वासाने आणि पुरेशा वेळेत सोडविता आली तर तो नक्कीच बोनस ठरेल. वेगवेगळ्या शाखांसाठीचे कट ऑफ हे ४५ गुणांच्या वर गेलेले नाहीत. याचा विचार करता सोडविलेल्या प्रश्नांची संख्या आणखी कमी झाली तरी कट ऑफ नक्कीच गाठता येईल. मात्र त्यासाठी मूलभूत अभ्यास पक्का झालेला असणे आवश्यक आहे.
First Published on May 31, 2019 12:14 am
Web Title: article on engineering services technical affinity
No comments:
Post a Comment